Extrait de la chronique de l’Anonyme de Béthune (Texte complet).

En cel tans meisme revint Othe, l’empereor de Rome, enl aie le conte Ferrant, por l’amor de son oncle le roi d’Engleterre ; et quant li rois de France sot noveles de sa venue, il ne fist pas samblant de pereceus, ains manda ses haus homes, et assambla molt grant ost, et chevauça vers l’empereor, qui à Valencienes estoit, et li cuens Ferrans od lui, et Henris, li dus de Louvaign, et Galerans, li dus de Lemborch, et Rainaus de Dantmartin, li cuens de Boloigne ; et si iert uns cuens d’Alemaigne que on apeloit le conte Velu, et si iert li cuens de Rekeneborc, uns molt boens chevaliers, en qui l’emperere od grant fiance.

Et si ièrent venu od l’empereor dui autre haut home qui molt erent de grant pris, dont li uns ot à non Bernars d’Ostemale, et li autres Contai de Tremoigne. Li cuens Guillaume Longe Espée, qui cuens ert de Salesbieres et frères le roi d’Engleterre, et ert venus de par son frère, et Jehans li fils Hue, et Hue de Bove ierent venu od lui, et maint autre chevalier.

Li Flamenc ièrent venu molt efforciement, et totes les comugnes de Flandres. Galerans de Lemborch, li fils le duc qui la contesse de Lussebore avoit espousée, venoit à eaus, od bien VIIc chevaliers ; mais li rois de France, qui n’ert pas chiverc, envoia par engien frère Garin à els à Valencienes, qui prist triewes à els XV jors, et parlement à Hainon Chaisnoi, puis passa outre et fist tant par deniers à Galeran qu’il l’en flst retorner et faillir d’aie l’empereor et les Flamens.

Tel sont li non des haus homes qui od le roi de Franche alèrent à cele bataille : Oedes, li dus de Borgoigne ; Heinris, li cuens de Bar ; Henris, li cuens de Grantpré ; Jehans, li cuens de Beaumont ; Gauchiers de Chastellon, li cuens de Saint Pol ; Guillaumes, li cuens de Pontiu ; Ernols, li cuens de Ghisnes : Raols, li cuens de Soissons ; Mahieus de Montmorenci ; Guillaumes des Bars ; Engourans de Couchi, et si doi frère, Thumas et Robert, et maint autre haut home, dont je n’en voeil pas les noms nomer, car trop i auroit paine.

A Tornai, sa cité, vint li rois de France, et l’emperere et cil de là vindrent, d’autre part, à Mortaigne, un chastel Everard Radol, le chastelain de Tornai, qu’il tenoit del conte Ferrant. Et quant li roi de France sot les noveles qu’il erent si près de lui, il ot doute ; car il n’avoit que trois lieues de Tornai dusq’à Mortaigne. Lors manda ses haus homes, et trova à son conseil qu’il s’en iroit landemain vers Franche.

Quant ce vint landemain, li rois fist totes ses gens armer et ses eschieles ordener. Si s’en issi de Tornai et s’en ala le chemin de L’Isle od s’ost tot ordenéement. Mais ce fu si grant aleure que tuit cil qui le virent tesmoignièrent bien que onques mais si grans os armé si grant aleure ne chevauça. Et quant ce sot l’emperere, et li cuens Ferrans, et lor gent qui à Mortaigne estoient, il que fistrent ? Il montèrent tuit armé et alèrent après li à defroi, com se il corrussent por proie rescorre ; et atainstrent le duc de Borgoigne et les Champenois qui l’arière garde faisoient, à un boschel à deux liewes près de Tornai, et les apressèrent tant que cil de l’arière garde s’arestèrent et tornèrent les visages devers els, et envoièrent lor arbalestriers traire à els por lor gent metre arière. Ensi fistrent li Flamenc cet jor v fois l’arière garde arester et torner devers els, tant que li dus de Bourgoigne manda al roi qu’il chevauçast belement ; car on les apressoit molt.

A un monstier que on apele Bovines prés de Cisoign, où la roine mest jadis, vint frére Garins al roi ; si le trova descendu, où il s’estoit disnés de pain et de vin. Si li dist : "Que faites-vos ?". "Bien" dist li rois, "chi me sui disnés". "C’est boen" dist frére Garins ; "or vos armés ; car cil de là ne voelent en nule fin la bataille metre en respit dusq’à demain, ains l’aurés ja. Car véés les chi à meisme de nous".

Il estoit diemenches, et por ce vousist li rois molt volentiers que la bataille eust esté mise en respit jusqu’à landemain, por l’onor del boen jor ; mais quant il vit qu’il autrement ne pooit estre, il s’arma, et puis entra el monstier et fist orisons, et ot molt tost oré. Puis monta sor son cheval et ne sambla pas effréés ; car il devisa et ordena molt sagement et molt seurement son afaire et non esbaiement, et fist crier que tuit, et chevalier et autre, ralaissent à lor batailles. Et sachiés que grant partie de l’ost estoit ja passée un pont qui là estoit fais sor une petite rivière, et ot ja pluisors paveillons tendus outre le pont et une praierie où li rois ot empensé à herbergier.

Si come li rois ot ses eschieles ordenées, et eles chevauçoient de front, molt i poissies veoir bele gent et plenté de riches armes et de beles banières, et d’autre part autresi. Mais sachiés qu’il ne se venoient pas si bien ni si ordenéement com li François aloient vers els, et ce lor parut.

Si com les os s’estoient tant entreprochiés qu’eles s’entreveoient de plain, longuement s’arestèrent d’une part et d’autre, et atierèrent lor affaire. Tant que li rois manda à une bataille de sergans à cheval, qui portoient tot penonceaus en lor glaives, qu’il alaissent asambler, et il si fistrent. Si corrurent su as Flamens et fistrent molt bone alée.

Ernols, li chastelains de Raisse, qui devers les Flamens estoit, ains qu’il i eust rien fait dont on parler deust, laissa corre entre ii rains, et corrus sore les arbelestriers, et les mist à la voie, et en porta un à terre, et corrut outre dusqu’as chevaliers, et porta en son venir molt roidement à terre un bacheler que on apeloit Michiel d’Auchi, et passa outre, et revint sains et saus à ses gens ; par qoi il fu molt proisiés.

Lors corrut li cuens de Flandres as Champenois, et li Champenois à lui, et ot trop bone meslée entre aus. Mais li Champenois furent mis arière.

Lors corrut li viscuens de Meleun, en qui bataille se tenoient li quens de Pontieu et li cuens de Ghines et tot cil del fief Looys, le fil le roi, qui manoient entre Some et la Lis. Cele bataille fist arester la chace, et i ot lors si boen estor que li preudome qui là furent tesmoignièrent qu’il onques mais n’avoient veu si boen tornoiement com la bataille fu une pièce.

Bauduens de Praet, uns riches hom de Flandres, porta Huon de Malaunoi qui molt ert bons chevaliers, od le cheval à terre, en mi l’estor, à une pointe qu’il fist à lui.

Lors corurent les routes d’une part et d’autre sans atargier, et s’entr’asamblèrent, et les trompes le roi sonèrent ; car il meismes vint à l’estor, si fondi ses chevaux desous lui, mais tost fu relevés. Cel jor porta son ensaigne Gales de Monteigni, uns cevaliers de Vermendois, qui molt bien la porta.

Gauchiers de Chasteillon, li cuens de Saint Pol, corrut tot outre la bataille et la desrompi molt malement. Et quant ce vit Henris, li dus de Louvaign qui encor n’ert asamblés, il se mist à la fuie et commencha la desconfiture.

Lors fu pris li cuens Ferrans, et li Flamenc commencièrent à formier, et ne commencièrent à metre à la voie li uns après l’autre. Qui lors veist les preudomes de France aler par cele bataille et metre les Flamens et les gens l’empereor à mal, bien li peust membrer de gentils barons.

Mahius de Montmorenci tenoit un faussart en sa main et seoit sor un grant cheval. Qui lors le veist com il corroit par mi cel estor, et com il s’en aloit bruiant, et com il portoit chevaliers à terre et metoit lot gent à mal, por nient ramenteust nul meillor chevalier.

Oedes, li dus de Borgoigne, qui la cote à armer Guillaume des Barres le boen chevalier avoit vestie, mais il portoit son meisme escu. Sachiés qu’il i fist tant d’armes qu’il en fu parlé en bien dusqu’en la terre de Surie. Il se regarda d’une part, et vit Ernols d’Audenarde, uns des plus haus homes de Flandres et un des meillors chevaliers, tos fust il petis, où il estoit arestés devant les sergans. Si li corut seure. Et quant Ernols le vit venir, il dist à ses gens : "Seignor, véés ci Guillaume des Bares, lor boen chevalier, où il vint sor noz. Tornons lui les chies des chevaux, car s’il nos prent al travers, il nos metra ja trop à mal". Et ce disoit il por ce qu’il quidoit del duc que ce fust Guillaume des Bares por sa cote à armer qu’il portoit. A ces mos, lor vint li dus, et Ernols l’atendi bien et hardiement. Si com il tenoient meslée entr’els, li dus s’abaissa et li volt son cheval esboeler, mais Ernols tint un coutel en sa main et visa le duc à ferir en l’oeillière del hiaume ; mais li dus s’abaissa et guenchi le cop, et puis se mist à la voie. Et quant Ernols l’en vit aler, il dist à un sien escuier que on apeloit Estoutin : "Diex aie !" Dist Estoutins : "Encore nos potoit bien Diex aidier, puisque lor bons chevaliers s’en vet et nos guerpist place". Mais ce n’estoit pas cil que il quidoit. Ains ert cil en mi l’estor, où il faisoit ce qu’il savoit bien faire. Che estoient beles proeces et parans.

Que voz en diroie je plus ? Totes furent desbaretées les gens l’empereor et les gens le conte Ferrant. Li cuens Ferrans meismes fu pris, si com je voz ai devant dit, od grant plenté des haus homes de sa terre. Il fut pris Hellins de Warevin, li seneschaus de Flandres, qui assés noveaus chevaliers estoit. Si furent pris li troi fil Rasson de Gaure, le boteillier de Flandres. Rasse, li ainsnés, qui molt ert preudom de son aage, et si dui frère Ernols et Phelippes. Si fu pris Girars de Grinberghes, qui molt ert preudom autresi. Si furent pris autresi Gauters de Ghistele et Phelippes de Maulenghien qui molt valoient ; et Pierre del Maisnil, uns jouenes hom, li fils le boen Pieron del Maisnil, qui tant fu preudom et sages. Robiers de Betune fi pris ; mais il fist tant à un chevalier que on apeloit [Flamenc de Crespelaines], que cil le delivra et mist à salveté.

Des gens le roi d’Engleterre furent pris Guillaume Longe Espée, li cuens de Salesbieres, frère al roi d’Engleterre.

Si fu pris Rainaus de Dantmartin, li cuens de Beloigne et pluisor autre chevalier od ces deus contes.

Des gens l’empereor fu pris li cuens Velus et Bernars d’Ostemale, uns très boens chevaliers, et Conras de Tremoigne, qui molt revaloit, et pluisor autre.

Ernols d’Audenarde, qui flamens estoit, fu ensement pris ; mais li rois l’ostega tantost al comte de Soissons, qui cousins il estoit, et à Rogier de Rossoi qui fille il avoit. Par qoi li dus de Borgoigne dist al roi, le soir "Voz avés droit qui l’ostegiés ; car vos eussiés deus cens chevaliers plus en vostre prison que voz n’aiés se il ne fust". E li rois respondi el duc : "Par la lance saint Jaque, dus de Borgoigne, ce croi je bien ; mais il n’ama onques la guerre, et toz jors l’a desloée à son seignor, ne onques n’en volt faire homage al roi d’Engleterre quant li autre le fistrent ; et se il m’a fait damage par son seignor loiaument servir, de ce ne li sai je nul mal gré". Icest honor dist li rois à Ernols d’Audenarde.

Que voz en diroie je plus ? Tant i ot pris d’uns et d’autres, de barons, de bachelers, de sergants, que ce ne fu se merveille non. Près furent chacié de deus loée de terre. L’emperere s’enfui vers Valencienes, et jut la nuit à l’abeie de Saint Sage, et li autre s’enfuirent çà et là, si com il porent com gent molt desbaretées.

Et li rois s’en repaira en France od tote s’ost et od ses prisoniers, et mist le conte de Boloigne en la tor de Pierone en prison, et les autres mena à Paris. Si mist le conte ferrant en prison en la tor de Lovre ; et Ustace del Roes od lui, un haut home de Hainau, que on tenoit à molt haut home et à molt faintisme. Et des autres mist il la plus grans partie en prison en chastelet sor Grand Pont et une partie en Chastelet sor Petit Pont ; ilueques les tint lonc tans, et ot puis grant raençon des pluisors, et au quant li eschapèrent si com vous orrés.

Mais puis ne fu qui guerre li osast movoir ; ains vesqui puis en grant pais, et tote la terre fu en grant pais grant pièce, fors de ses baillius, qui molt faisoient de tors, et li baillius son fil assés plus, de tant de terre com il ot à tenir ; et ce fu par un sien sergant que on apeloit Nevelon, qui baillius estoit d’Arras, qui en tel servage most tote la terre de Flandres, qui en la partie Looys estoit eschues, que tot cil ki en ooient parler s’en esmerveilloient coment il li pooient souffrir ne endurer.

Cele bataille de Bovines fu faite par un diemenche, el mois de julie, en l’an de l’incarnation mil ans et deus cens et quatorse.